Buhay na Titik: NBDB Accreditation para sa mga Publisher

ni Alvin J. Buenaventura ng FILCOLS

NBDB Accreditation para sa mga Publisher

Isa sa mga paraan para mapasigla ang industriya ng paglilimbag ng libro sa bansa ay ang pagkuha ng accreditation mula sa National Book Development Board.

Ano ba ang accreditation at bakit mahalaga ito?

Ang accreditation ay ang opisyal na pagtatalaga o pagse-certify na ang publisher ay nakarehistro sa NBDB. Siyempre, bago mabigyan ng certificate of registration, maraming dokumentong dapat na makumpleto at maisumite ang isang publisher.

Ito ang magpapatunay na legit ang operation ng publisher. Ang NBDB lamang ang ahensiya ng gobyernong may kapangyarihang magbigay ng accreditation sa mga publisher.

Ano naman ang benepisyo mula sa accreditation?

Ang mga NBDB accredited publisher lamang ang puwedeng makisali sa malaking public school textbook market. Dahil milyon-milyon ang mga librong kailangan, malaking kita rin ang pinag-uusapan dito.

Ang mga publisher na mapapatunayang gumagawa ng di patas na mga business practice, na eventually ay magiging dahilan ng pagtaas ng presyo ng mga libro ay puwedeng matanggalan ng accreditation.

Maliban sa pagsali sa public school textbook market, ang registration sa NBDB ay mahalaga dahil nagiging updated ang database ng industriya. Kapag may database ay mas madaling makontak at ma-monitor ng NBDB ang mga registered entity. Mas mabilis nilang makikita ang lagay ng industriya. Mas madali silang makagagawa ng mga intervention para mapasigla ito tulad ng mga tax incentive o kaya ay mga seminar at training program.

Ilan sa mga non-fiscal incentive ng NBDB para sa industriya ay ang Academic Publishing Conference na ginaganap twice a year, Booklatan sa Bayan na ginaganap sa 12 iba’t ibang panig ng bansa, World Book and Copyright Day tuwing Abril, at ang selebrasyon ng Philippine Book Development Month tuwing Nobyembre.

Inaanyayahan din ng NBDB na mag-register ang printers, book sellers, book importers, book distributors, paper manufacturers, book industry associations, at academic publishers.

Katuwang ng NBDB sa pagpapaunlad ng industriya ang FILCOLS. Para mas maging malalim at malusog ang iyong kaalaman, bisitahin ang websites namin: www.filcols.blogspot.com at www.nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: National Book Policy - Pagpapalaganap ng mga Akdang Gawa ng Filipino

ni Alvin J. Buenaventura ng FILCOLS

National Book Policy - Pagpapalaganap ng mga Akdang Gawa ng Filipino

  

Ayon sa RA 8047, ang National Book Policy ay “statement of the intention and philosophy of the State as a basis for the formulation and implementation of measures for the development, production, and distribution of books.”

Mahabang konsultasyon ang ginawa ng National Book Development Board para mabuo ang National Book Policy. Nagpunta sila sa mga rehiyon, nakipag-usap sa mga author, publisher, librarian, professor, journalist, at iba pang stakeholder ng industriya.

Sa bisa ng Executive Order No. 119 na ipinalabas ni Pres. Estrada noong July 4, 1999, pinagtibay at kinilala ang National Book Policy na opisyal na policy ng bansa pagdating sa book publishing industry.

Ano ang unang statement dito?

Dapat lumikha ang gobyerno ng pinakamagandang kondisyon para maipalaganap ang mga akdang Filipino. Kailangang gumawa ng mga bagong activity para mapalago ang industriya.

Hindi puwedeng puro seminars at talks na lang dahil magsasawa na rin ang mga participant.

Nakasaad din na dapat ay maka-develop ng mga bagong author na tututok sa pagsusulat ng mga paksang tulad ng local histories kung saan kakaunti lamang ang published materials. Kailangan ding ma-upgrade ang kakayahan ng mga author. Para magawa ito ay inatasan ang NBDB na manguna sa pagbuo ng partnerships sa iba’t ibang institusyon tulad ng DepEd, CHED, at mga stakeholder sa book publishing.

Dapat na maparami ang mga libro sa Filipino literature, heritage, at creative arts sa pamamagitan ng pagbibigay-suporta sa mga nais magsulat o gumawa ng libro.

Dapat na suportahan ang paglilimbag ng mga libro sa English at mga lengguwahe sa bansa.

Dapat na maparami ang Filipino authorship ng mga librong scientific at technical. Pati na rin ang pagsasalin sa mga lengguwahe sa bansa ng mga foreign-authored books.

Para lalong maparami ang akda mula sa mga rehiyon, dapat na may registration system at database ng mga manuscript na local at foreign. Kahit na “manuscripts” ang salitang ginamit sa halip sa finished works, malinaw na published books ang ibig sabihin dahil wala namang foreigner ang maglalabas ng manuscripts.

Dapat na magkaroon ng training ng mga author at students para makapagsulat sila ng mga akdang may local character at experience. Magagawa ito sa pamamagitan ng pakikipag-ugnayan sa mga university sa mga rehiyon.

Dapat na bigyang-proteksiyon ang IP ng mga author at publisher sa pamamagitan ng collective reprography licensing. Dahil dito ay binuo ang FILCOLS.

Dapat na bigyang-pagkilala ang mga tao o organisasyon na tumulong sa pagpapaunlad ng industriya. Puwedeng maggawad ng pagkilala sa pamamagitan ng awards, prizes, at iba pang uri ng pagkilala.

Dapat na makapaghanap ng pondo para sa mga author at iba pang personnel ng industriya. Dahil dito ay isinulong ng NBDB ang pagpasa ng batas RA 9521 o ang National Book Development Trust Fund.

Dapat na maengganyo ang mga author na magbuo ng mga asosasyon na makakatulong sa pagbibigay sa kanila ng proteksiyon at sa pag-usbong ng mga bagong gawa.

Katuwang ng NBDB sa pagpapaunlad ng industriya ang FILCOLS. Para sa dagdag na kaalaman, bisitahin ang mga website: www.filcols.blogspot.com at www.nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: Mga Gabay na Prinsipyo sa Likod ng National Book Policy

ni Alvin J. Buenaventura ng FILCOLS

Mga Gabay na Prinsipyo sa Likod ng National Book Policy

Nakasaad sa RA 8047 sec. 2, ang State Policy ukol sa industriya ng paglilimbag ng libro: to promote the continuing development of the book industry, with the active participation of the private sector, to ensure an adequate supply of affordable and quality-produced books not only for the domestic but also for the export market.

Ang State Policy ay ang prinsipyong nagsisilbing gabay ng pamahalaan. Nagsasaad din ito ng course of action o mga hakbang na dapat isagawa para maabot ang layon.

Ang layon ng gobyerno ay mapaunlad ang industriya ng paglilimbag ng libro. Katuwang nito ang bibong partisipasyon ng private sector. Para umunlad ang industriya ay dapat na may sapat na supply ng mga libro. At ang mga libro ay dapat na de-kalidad at may presyong abot-kaya. Ito ay para sa mga mambabasang Filipino at ang iba ay pang-export din.

Bakit kailangang paunlarin ng gobyerno ang industriya ng paglilimbag ng libro? Di ba ang dapat na pagtuunan ng pansin ay ang makaahon sa kahirapan ang mga Filipino, makakain nang sapat, maging malusog, magkaroon ng tahanan, at trabaho?

Pinagtutuunan ng pansin ng gobyerno ang industriya dahil ito ay may mahalagang papel sa national development. Ayon sa pag-aaral ng World Intellectual Property Organization, ang copyright-based industries sa Filipinas ay nagbibigay ng trabaho sa 300,000 tao. Isa ang book publishing sa mga copyright-based industry.

Kung nakakapagbigay ng trabaho sa 300,000 tao ang mga copyright-based industry, ibig sabihin may 1.2 milyong tao ang naiibsan ang kahirapan, nakakakain, napapanatili ang kalusugan, at nakakapanirahan sa disenteng tahanan.

Paano nangyari ito? 300,000 x 4 = 1,200,000. Ibig sabihin: ang taong nagtatrabaho kasama ang umaasa sa kanya, ang asawa at tatlong anak. Siyempre hula lang natin ito dahil ang resulta ng pag-aaral ng WIPO ay 300,000 empleyado ng mga copyright-based industry kung saan kabilang ang book publishing. Puwedeng mas mababa o mas mataas ang bilang ng mga taong dependent sa kanila.

Pero ang punto ay nakakatulong ang book publishing na maiahon sa kahirapan ang mga Filipino at nakakatulong itong maibsan ang malawakang unemployment.

Ayon din sa RA 8047, ang national development ay may dalawang pundasyon: economic at social growth. Hindi sapat na may materyal na bagay lang ang isang bansa, dapat ay maunlad din ang kultura. At ang mga libro ay siyang mabisang instrument para sa intellectual, technical, at cultural development ng mga tao.

Dahil dito, hindi lamang ang may trabaho sa book publishing at kanilang pamilya ang nakikinabang, lumalaki rin ang bilang ng nabibigyan ng benepisyo dahil ang mga libro ay maraming nararating, malayo ang nararating.

Mabisa ang libro at isa itong instrumentong abot-kaya para mapasakamay ng lahat ang edukasyon. Mahalaga din ang libro sa pagpapakalat ng kultura dahil dito nakasulat, nakalarawan, at naka-preserve ang ating kasaysayan, mga nobela, mga tula, awit, at iba pa.

Katuwang ng NBDB sa pagpapaunlad ng industriya ang FILCOLS. Para mas maging malalim at malusog ang iyong kaalaman, bisitahin ang websites namin: filcols.blogspot.com at nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: Sa Loob ng NBDB

ni Alvin J .Buenaventura ng FILCOLS

Sa Loob ng NBDB

Ang DNA ang siyang pinagmumulan ng instructions o kautusan kung papaano made-develop at magpa-function ang lahat ng buhay na organismo. Ang Republic Act ang DNA sa pagbubuo at pagtakbo ng ahensiya ng gobyerno tulad ng National Book Development Board.


Ayon sa RA 8047 o Book Publishing Industry Development Act, para mabigyan ng karampatang serbisyo ang industriya ng paglilimbag ng libro sa bansa ay kailangang bumuo ng ahensiyang tatawaging NBDB.

Ang NBDB ay pinamumunuan ng Governing Board. Ito ay may labingisang miyembro na appointed ng Pangulo ng Filipinas. Lima mula sa gobyerno at anim mula sa private sector.

Sino-sino ang mga ito? Sa panig ng gobyerno, pipili ng limang kinatawan. Isa mula sa bawat ahensiya: Department of Education, Department of Science and Technology, Department of Trade and Industry, at National Commission for Culture and the Arts. Ang Commission on Higher Education ay puwedeng mag-nominate ng kinatawan mula sa academe at ang Technical Education Skills Development Authority ay puwede ring mag-nominate ng kinatawan mula sa training institutions.

Sa panig ng private sector, pipili ng anim na kinatawan na nominado ng mga organisasyon ng book publishers, printers, writers, book industry related activities, students, at private education sector.

Ang Governing Board ay pumipili ng chair mula sa kanilang hanay. Ang kinatawan mula sa DepEd ang ex-officio vice chair. Ibig sabihin automatic na ikalawang pinuno ang kinatawan ng DepEd.

Ang Governing Board ang magpapatupad ng mga policy at layon ng batas. Sila rin ang bubuo ng mga programa para sa ikauunlad ng industriya ng paglilimbag ng libro.

Para maisakatuparan ang mga programa mula sa Governing Board, kailangan ng Secretariat na siyang magpapatupad o mag-e-execute ng mga plano. Ang Secretariat ay pinamumunuan ng Executive Officer. Katuwang niya sa pagpapatakbo ang Deputy Executive Officer. Ang dalawang opisyal ay appointed ng Pangulo ng Filipinas.

May kapangyarihan ang Executive Officer na magrekomenda sa Governing Board kung papaano oorganisahin ang Secretariat, bilang ng kawaning kailangan, ano ang function ng bawat kawani at division, pati na rin ang compensation plan para sa mga kawani. Siyempre kailangan pa ring aprubahan ng Governing Board ang rekomendasyon ng Executive Officer.

Inatasan din ng batas ang NBDB na bumuo ng mahahalagang dokumento tulad ng
National Book Policy, National Book Development Plan, at Implementing Rules and Regulations ng RA 8047. Kung ang batas ang DNA, ang mga dokumentong nabanggit ang mga organ para makatakbo nang maayos ang ahensiya.

Katuwang ng NBDB sa pagpapaunlad ng industriya ang FILCOLS. Para mas maging malalim at malusog ang iyong kaalaman, bisitahin ang websites namin: www.filcols.blogspot.com at www.nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: Kung Paanong Binuo ang NBDB

ni Alvin J. Buenaventura ng FILCOLS

Kung Paanong Binuo ang NBDB

Nakakapagbigay ng serbisyo ang gobyerno sa industriya ng paglilimbag ng libro sa pamamagitan ng National Book Development Board.

Ganito ang daloy ng pagkakabuo ng isang ahensiya ng pamahalaan tulad ng NBDB.

Dahil ang bansa ay isang republikang demokratiko, sa mga mamamayan o publiko nanggagaling ang kapangyarihan. Sa pamamagitan ng pagboto sa mga taong magiging representante nila sa gobyerno, pansamantalang inililipat ng publiko ang tiwala nila sa mga taong ito. At kung sino ang lalabas na may pinakamaraming boto, siya ang masasabing ginusto ng nakararami para mamuno. Siya ang inatasang mamuno sa Republika.

Ang mga senador at kongresistang nanalo ang siyang tinatawag na mambabatas dahil sila ang inatasan ng publikong tumingin sa kanilang kapakanan at magbigay ng daan sa sama-samang pag-unlad sa pamamagitan ng paggawa ng mga batas.

Ang mga panukalang batas ay maaaring manggaling sa mga ahensiya ng gobyerno, sa akademya, sa mga industry association, o sa opisina mismo ng mga mambabatas. Ang panukalang batas ay isasalang sa senado at sa kongreso para mapag-aralan nang husto. Magdedebate nang todo ang iba’t ibang panig para mapiga at makatas ang panukala. Dito lalabas ang kagandahan o kapangitan ng inihahaing batas.

Lahat ng panukalang batas ay dumadaan sa tatlong salang ng debate at pagpasa. Ang unang salang nito ay ang first reading. Kapag pumasa dito ay aakyat sa second reading. Kapag umabot na ang panukalang batas sa third reading, ito ay naging pokus na ng matinding debate at nadalisay na. Ang huling anyo nito ay ang pinagsamang bersiyon ng panukalang batas mula sa mga senador at bersiyon mula sa mga kongresista. Ang huling anyo ang ipinapagtibay ng pangulo ng Filipinas bilang batas. At tinatawag na itong Republic Act. Ang batas na nagmula sa publiko.

Pero siyempre may kapangyarihan din ang Pangulo ng Filipinas na magtayo ng ahensiya ng gobyerno sa pamamagitan ng Executive Order. Ang mga ganitong ahensiya ay madalas na nagsisilbing pansamantalang solusyon sa isang urgent na problema. Hindi sila pangmatagalan at madaling mabuwag.

Matagal na panahon ang kailangan para makapasa ang panukalang batas sa senado at sa kongreso. Kaya kapag nais buwagin ang ahensiyang binuo sa pamamagitan ng Republic Act, matagal na panahon din ang kailangan.

Ang NBDB na binuo sa bisa ng Republic Act 8047 ay matagal na hinintay ng mga tao mula sa industriya ng paglilimbag ng libro sa ating bansa. Ngayong nakatayo na, ang ahensiya na ang siyang nagpapatupad ng RA 8047 at nagsisilbi sa mga pangangailangan ng industriya.

Katuwang ng NBDB sa pagpapaunlad ng industriya ang FILCOLS. Para mas maging malalim at malusog ang iyong kaalaman, bisitahin ang websites namin: www.filcols.blogspot.com at www.nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: Batas tungkol sa Pagpapaunlad ng Book Publishing Industry ng Filipinas

ni Alvin J. Buenaventura ng FILCOLS

Batas tungkol sa Pagpapaunlad ng Book Publishing Industry ng Filipinas

Para mapaunlad ang kultura at kaalaman ng bansa, isang malusog na book publishing industry ang kailangan.

Kaya naman, para lalo pang mapalusog ang book publishing industry, nagtutulong-tulong ang iba’t ibang grupo para hikayatin ang mga mambabatas na aprubahan na ang mga nakabinbing batas sa Senate at sa House. Ito ang vitamins na kailangan ng book publishing industry.

Masugid na binantayan ng Association of Philippine Booksellers, Book Development Association of the Philippines, Book Suppliers Association of the Philippines, Philippine Educational Publishers Association at marami pang iba ang Senate Bill No. 252 at House Bill No. 12614.

Hiling ng mga grupo na i-privatize ang procurement ng mga teksbuk sa mga public school dahil ito ang pinakamalaking market ng libro sa bansa. Ang paglilimbag ng mga teksbuk para sa mga public high school ay dating hawak ng dalawang ahensiyang itinayo ni Marcos: ang Textbook Board (1979) at ang sumunod dito na Instructional Materials Corporation (1983).

Binuwag ni Pangulong Cory Aquino ang IMC noong 1991 at itinatag naman ang Instructional Materials Development Center sa bisa ng Executive Order No. 492.

Pero hindi pa rin lumusog-lusog ang book publishing industry natin dahil nag-aagawan ang mga publisher sa napakaliit na private school textbook market. Halos wala itong sustansiya dahil andami-dami nilang naghahati sa napakakonting pagkain. Kailangan nilang makasali sa public school textbook market para lalo pang lumaki ang mga kompanya at mas marami ang mabigyan ng trabaho. Kung maibibigay ito sa kanila, dadami ang pagkain na sasapat para sa bawat isa.

Pag-upo ni Pangulong Ramos, agad niyang ipinatupad ang pagsasapribado ng non-performing government assets. Kung kaya naman gawin ng private sector ang trabaho, dapat na hindi na ito pakialaman pa ng gobyerno. Kumbaga, mas maliit ang role ng gobyerno, mas efficient.

Kaya noong 7 June 1995, nilagdaan ni Pang. Ramos ang pinagsamang Senate at House bills na naging Republic Act 8047 o ang Book Publishing Industry Development Act. At binuksan ang public school textbook market sa mga private publisher. Ito ang privatization ng publishing ng public school textbooks.

Ang RA 8047 din ang nagtatag sa National Book Development Board (NBDB) na siyang “punong abala” sa pagpapalago ng book publishing industry natin. Ang ahensiya ay isang policy-making body. Siyempre kasali rin sa mga gawain nila ang pagpapalaganap ng pagbabasa, pagsusulat, at iba pang bagay na may koneksiyon sa libro.

Katuwang naman ng NBDB sa pagpapaunlad ng industriya ang FILCOLS. Para mas manatiling malusog ang inyong kaalaman tungkol dito, bisitahin ang websites naming: filcols.blogspot.com at nbdb.gov.ph.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.

Buhay na Titik: World Book and Copyright Day

ni Alvin J. Buenaventura ng FILCOLS

World Book and Copyright Day

Bakit tuwing Abril 23 ay nagsasaya ang lahat ng book worms at bibliophile sa buong mundo?
Sapagkat ito ang World Book and Copyright Day o Pandaigdigang Araw ng mga Libro at Karapatang-sipi.

Ang pagdiriwang na ito ay itinalaga ng UNESCO o United Nations Educational, Scientific, and Cultural Organization simula pa noong 1995. Inaanyayahan ng UNESCO ang mga bansang kasapi nito na gumawa ng mga gimik para lalo pang mahalin ng mga tao ang libro at gawing bahagi ng kanilang kultura ang pagbabasa. Siyempre kasama rin dito ang paggalang sa copyright ng mga author.

Sa Pilipinas, ang mga ahensiyang nangunguna sa selebrasyon ng World Book and Copyright Day ay ang National Book Development Board (NBDB) at ang Intellectual Property Office of the Philippines (IPO PHL).

Ang NBDB ang pangunahing ahensiya ng gobyerno na sumusuporta at nagpapalago sa industriya ng paglilimbag ng libro sa Pilipinas. Binuo ang ahensiya sa pamamagitan ng Republic Act 8047 o Book Publishing Industry Development Act of 1995.

Ang IPOPHL naman ay ang ahensiya ng gobyerno na pangunahing layunin ang mabigyan-proteksiyon ang intellectual property (IP) ng mga siyentipiko, imbentor, artists, at iba pang malikhaing mamamayan. 

Ang IP ang siyang nagpaunlad sa maraming bansa tulad ng Japan, US, Germany, at Singapore. Ang IP ng mga Pinoy at Pinay ang siya ring makakatulong sa pag-unlad ng ating bayan. Binuo ang IPOPHL sa bisa ng Republic Act 8293 o ang Intellectual Property Code of the Philippines noong 1998.

Sa ibang bansa, kanya-kanya ng gimmick sa pagdiriwang. Halimbawa sa Spain, nagkakaroon ng pagbasa ng sikat na nobela ni Cervantes na “Don Quixote.” Non-stop ang pagbasa ng nobela, parang pabasa ng pasyon dito sa atin tuwing Mahal na Araw. Sa UK naman, ang mga guro at estudyante ay nagko-costume para maging kamukha ng paborito nilang tauhan sa libro.

Katuwang ng NBDB ang IPOPHL sa pagtataguyod ng book industry, pagkilala at pagprotekta sa karapatan ng mga author, at pakikipagtulungan sa mga pribadong organisasyon tulad ng mga samahan ng mga author, publisher, at iba pa.

Madalas ay gumagawa sila ng mga event para matulungan ang mga author lalo na sa kanilang “copyright issues.” Nag-oorganisa sila sa talks na nakatutok sa karapatan ng mga author, sa pagkakaroon ng patas na kontrata para sa kanila at mula sa hanay ng mga publisher, sa mga bagong estilo at trends ng pagsusulat, at kung papaano nila madadala sa market ang kanilang mga akda.

Ang pandaigdigang selebrasyong ito ay nag-ugat sa Catalonia, Spain. Noong Middle Ages ay ipinagdiriwang ang pista ni St. George. Binibigyan ng kalalakihan ang kani-kanilang mga girlfriend ng mga rosas. Naisip ng mga publisher sa Catalonia noong 1920s na dapat ang tugon ng mga babae sa rosas ay pagbibigay ng libro. Exchange gift kumbaga. Kapalit ng rosas ay libro. Naging masigla ang book industry sa Catalonia tuwing Abril 23 dahil dito. Mas maraming rosas at libro ang nabenta. At siyempre, ang lahat ay masaya. Babae man o lalaki.

Nakita ng UNESCO ang kasikatan ng pistang ito at naging sikat din ang petsa dahil maraming sikat na authors ang ipinanganak o namatay nang Abril 23 tulad nina William Shakespeare, Miguel de Cervantes, Vladimir Nabokov, at iba pa. Kaya noong 1995, ginawa na itong pandaigdigang pagdiriwang.

Kaya simula ngayon, para mas marami pa ang sumaya, yayain mo na ang biyenan mo na samahan kang makisali o manguna sa mga event tuwing Abril 23: ang pagdiriwang ng World Book and Copyright Day.

Inaanyayahan ang mga awtor, publisher, o tagapagmana ng copyright na sumali sa FILCOLS. Ito’y para mabigyang proteksiyon ang kanilang mga akda. Kailangan lamang ay mayroon kayong published works kung kayo ay awtor/publisher o nasa inyo ang kapangyarihang magmanage kung heirs kayo ng awtor. Wala pong membership fee. Kung may tanong hinggil sa tinalakay na paksa, mag-email lamang sa filcols@gmail.com.